LAOAG CITY – Nabirukanen a maysan a bangkay ti maysa a lalaki iti ili a Bacarra kalpasan iti agarup a tallo a bulan a nagpukaw iti kakaykaywan a paset ti Bgy. Libtong iti nasao nga ili.
Binigbig ni Mrs.Vilma Albano iti Bgy. 1 iti ili a Bacarra ti lalaki a ni Rolando Lacar, kabsat na, ken residente met laeng iti nasao a barangay.
Segun ken ni Albano, bulan ti September pay idi nagpukaw ti kabsat na a ti pakada na iti asawa na ket mapan iti balay da gapu ta agkakarruba da laeng.
Kuna na nga inreport da met ti panagpukaw ti kabsat na iti cuerpo ti pulisya ken nagbirbirok da a nakadandanun da pay idiay Pudtol, Apayao a nakayanakan da ngem negatibo ti resulta na.
Nasdaaw ni Albano gapu ta awan met ti ammo da a rason tapno aramiden ti kabsat da ti agpakamatay malaksid iti sakit na ti puso.
Nabigbig ni Albano ti kabsat na babaen iti kallugong ken tsinelas a soot na idi naudi a nakita da.
Awan met ti panagatap ni Albano nga adda “foul play” ti pannakatay ti kabsat na.
Kabayatan na, inlawlawag ni Bgy. Kagawad Filemon Teppang iti Bgy. Libtong iti ili ti Bacarra nga addan sumagmamano a bulan a maang-angot dagiti kabarangayan da ti nabangsit nga angot.
Segun ken ni Teppang, ti ammo dagiti kabarangayan da ket gagangay nga angot manipud kadagiti matmatay nga ayop kas iti manok wenno pusa ngem gapu ta nabayagen isu nga inkeddeng da a biruken.
Kuna na nga adda paset ti barangay da a kakaykayuan a ditoy ti nakakitaan da ti nakibitin a bangkay ti lalaki babaen iti posible nga iyu-uli iti kayo ti sagat kalpasan na ket nagtapwak.
Pinasingkedan na a mangrugin nga agrupsa ti bangkay ni Lacar ken ti nakaigalutan ti tali iti tengnged na ket makitan ti tulang na.
Ibilang met ti PNP-Bacarra a “close case” ti pannakatay ni Rodolfo Lacar iti Bgy. 1 ti nasao nga ili.
Segun kadakuada, gapu ta uray dagiti kameng ti pamilya ti biktima ket kumbinsido da a nagpakamatay ni Lacar ket awan ti rason tapno iwayat da pay ti agimbestigar.
Mainaig iti daytoy, nagpannawagan ti PNP-Bacarra kadagiti maseknan a no adda parikot iti biag ket masapul nga iyuman da kadagiti ammo da a makatulong kadakuada a saan ketdi a sulsuluen da gapu ta amin a problema ket adda latta solosyon na.
