LAOAG CITY – Indeklarar ni President Samia Suluhu Hassan ti outbreak ti Marburg virus iti Tanzania.
Inaramid daytoy ti presidente kalpasan ti agarop makalawas nga inlibak ni Health Minister Jenista Mhagama nga adda ti kaso ti nasao a sakit iti nadakamat a pagilian.
Iti press conference , inbatad ni Hassan a kinumpirmaran a mismo kenkuana dagiti health authorities nga adda ti maysa a kaso ti Marburg iti north-western region ti Kagera.
Agtalek ti presidente a kabaelan da a parmeken ti nasao a sakit iti pagilian da.
Maipalagip nga idi Enero 14 ita a tawen ket inreport ti World Health Organization (WHO) nga adda ti suspected Marburg outbreak iti Tanzania kalpasan a nakairekord ti siyam a maipagarop a kaso ti Marburg virus ken wallo ti pimmusay iti uneg laeng ti lima nga aldaw iti Kagera.
Nupay kasta, inpetteng ni Health Minister Mhagama nga iti panang-analisar da kadagiti samples ket naduktalan da a negatibo dagitoy iti Marburg.
