LAOAG CITY – Nangiparuk-at ti rakurak ni Senator Rodante Marcoleta kalpasan ti panngibabawi ni retired Marine Master Sergeant Orly Guteza iti immunan a testmoniana iti Senate Blue Ribbon Committee mainaig iti imbestigasion iti maipagarup anomalia iti flood control projects.
Maipalagip nga idi Setiembre 25, 2025, timmestigo ni Guteza iti Senado a nangilanad iti maipagarup personal nga ammona mainaig iti panangipatulod kadagiti minaleta a naglaonan dagiti dadakkel a gatad ti kuarta ken ni dati a House Speaker Martin Romualdez.
Iti baet daytoy, idi leng Agosto 19, ita a tawen, imbabawi ni Guteza ti immuna a rakurakna ken inakusaranna da Marcoleta ken ni dati a Congressman Mike Defensor a maipagarup nangisuro kenkuana tapno itudo ni Romualdez.
Iti Facebook statemen-na, naglikudan ni Marcoleta a nakitinnulag daytoy ken ni Defensor ken Guteza.
Segun ken ni Marcoleta, saan a nakapappapati a kayana a makabukel ti detalyado a rakurak mainaig iti panangipatulod ti minaleta a kuarta iti uneg laeng ti naakaba a panawen.
Inpetteng pay ti senador a saan a nakapappapati a napilitan ni Guteza a nagpirma iti baro rakurakna gapu iti pangta ti biag ken pannakaway-waya ti asawa ken dagiti annakna.
Kabayatanna, nagpanawagan ni Marcoleta ti panangitultuloy a panangbirok ti husto ken kadagiti nasken nga agsugbat mainaig iti maipagrup saan nga umno a panagusar ti pondo para iti flood control projects.
