LAOAG CITY – Naawaten ti Marcos Hall of Justice dagiti balota manipud iti ili ti Solsona kalpasan ti election protest ni Sangguniang Bayan Member Marvin Pascua.
Daytoy ket babaen iti nagbalin a pammilin ti Regional Trial Court Branch 65 ditoy siudad ti Laoag kontra kadagiti sumagmamano nga elected officials iti nasao nga ili.
Mainaig iti daytoy, personal a nagturong dagiti sheriff ken staff ti korte iti ili ti Solsona iti oras ti agarup alas dies itay bigat ita nga aldaw, Hunio 9 tapno alaen dagiti ballot boxes, tulbek dagiti ballot boxes, Vote Counting Machine, consolidation machine, electronic data storage, voter’s list ken records ken dadduma pay nga election related documents babaen kada ni Ms. Christina De Los Santos, Municipal Treasurer ken Ms. Merlyn Mabuti, Election Officer.
Nangipaay ti naiget a seguridad dagiti kameng ti Philippine National Police ti pannakaiyakar dagiti nadakamat nga election paraphernalia manipud iti lokal a gobierno iti ili ti Solsona agingga iti Marcos Hall of Justice.
Basar iti pannakisarsarita ti Bombo Radyo Laoag News Team kadagiti sumagmamano nga staff ti Regional Trial Court Branch 65 nga agarup alas dose itay pangaldaw a simmangpet dagiti nasao nga election paraphernalia nga insigida a naikabil dagitoy iti maikadua a kadsaaran kangrunaanna iti storage room.
Naammoan nga adda ti naisayangkat a pre trial babaen iti online itay alas dos ti malem.
Kabayatanna, saan met pay a masinunuo dagiti opisial no inton ano a pormal a mangrugi ti recount dagiti butos.
Maipalagip a nangipila ti election protest ni Konsehal Pascua gapu ta mamati daytoy nga adda ti napasamak nga anomalya kabayatan ti pannakaisayangkat ti 2025 Midterm Elections.
