LAOAG CITY – Nagpanawagan ti grupo a Marcos Resign Movement a dumalan ni Presidente Ferdinand Marcos Jr. iti hair follicle test tapno tuldukan dagiti isyu a maiyak-akusar kenkuana.
Inbatad ni Ret. Gen. Warlito Daos, dati a chief of staff for public safety ti Department of the Interior and Local Government (DILG), daytoy ti makitkitana a wagas tapno malawlawagan ti publiko kadagiti maibatbato nga alegasion kontra iti Presidente.
Inlawlawagna a nakasaganada nga agnaed lattan ditoy Ilocos Norte no kasapulan no dumalan ti Presidente iti panagpaagas.
Inpeksa ti grupo ti panawagan kagiddan ti Trillion Peso March a naisayangkat ita nga aldaw, Nobiembre 30, 2025 iti EDSA People Power Monument kas protesta kontra iti maanomalya.
Paset daytoy iti nagsina a panagtitipon ti grupo iti EDSA Shrine no sadinno a naminsan manen a sinubliananda ti isyu ti pannakairaman ti Presidente iti maanomalya kalpasan nga inbutaktak ti dati nga Ako Bicol Party-List Representative Elizaldy ”Zaldy” Co a naikabil amin ti P100 billion budget insertions iti Presidente ken ni dati nga House Speaker Martin Romualdez.
