LAOAG CITY – Maad-adal no matarimaan wenno mapabaro ti “rubberized track oval” ti Ferdinand Edralin Marcos Memorial Stadium ditoy siudad ti Laoag.
Segun ken ni Vice Gov. Matthew Marcos Manotoc, ti nausar a “method” iti nasao a proyekto ket babaen iti pannakausar dagiti “granules.”
Inbatadna a ti pagsayaatan daytoy ket mabalin nga ikkan kadagiti babassit a rubber ti paset ti “oval” nga adda dagiti naik-ikkat a “granules.”
Nupay kasta, inlawlawagna nga iti panangikunsultarna iti nasao a problema iti Philippine Sports Commission ket inbalakadda a nasaysayaat no masukatanen daytoy ti baro.
Mainaig iti daytoy, kunana a nagkiddawen ti tulong ti Philippine Sports Commission ken ti Philippine Track and Field Association wenno PATAFA tapno masolusionan ti dadael a paset ti “rubberized track oval.”
Kabayatanna, mamati ti bise gobernador a rumbeng a mapagsungbat ti “contractor” ti nasao a proyekto.
Inannugotna a sobra ti pannakadismayana iti alisto a panagdadael ti “rubberized track oval” ti Marcos Stadium agsipud ta iti baet ti binulan ti panangisayangkatna ti inspeksion iti nasao a lugar ket adu dagiti napasamak a saan a nasayaat.
Inlawlawagna a ti pannakaiyestablisar ti proyekto ket karaman iti kontrata ti “contractor” iti pannakapabaro ti Marcos Stadium.
Kunana a kaipapanan daytoy a ti contractor ti nagbiruk iti “rubber oval installer”.
Pakaseknan daytoy, kunana a dua dagiti grupo a nagtrabaho iti pannakaikabil ti “rubber track oval.”
Inpettengna a ti problema iti daytoy dagiti “rubber oval installer” ket nakakontrata iti babaen ti contractor.
Inlawlawagna a daytoy ti nangibati kenkuana ti leksion a masapul a ti Provincial Government of Ilocos Norte ti makikontrata tapno mabalinna nga ungtan ti contractor.
Iti baet daytoy, inpatalgedna a masapul a mapagsungbat ti “contractor” gapu ta nabiit pay ti proyekto nupay nalabsannan ti makatawen a “warranty” a daytoy ti mangibaklay a maminpinsan iti pannakatarimaan ti nadadael a paset ti proyekto.
