LAOAG CITY – Nakasaganan ti Ferdinand Edralin Marcos Stadium a pakaangayan ti Tan-ok ni Ilocano Festival of Festivals ita nga aldaw.
Aglukat ti Marcos Stadium inton oras ti alas kuatro ti malem ken first-come, first-served basis.
Libre ti mapan agbuya iti naindaklan nga aktibidad ti probinsia no sadinno nga awan ti mailaklako a ticket para iti daytoy.
Mangrugi ti dance competition inton oras ti alas sais ti sardam.
Mainaig iti daytoy, agbibinnalubal ti 21 nga ili ken maysa a siudad ditoy probinsia para iti Tan-ok ni Ilocano Festival of Festivals a maitampok ti kabukbukudanda a kultura.
Kabayatanna, naiget ti seguridad dagiti otoridad tapno maipasigurado ti linak, urnos ken talna iti lugar.
