LAOAG CITY – Inbalakad ni Dr. Sheryl Racelis, Medical Specialist II ti Mariano Marcos Memorial Hospital and Medical Center iti Siudad ti Batac a saan nga insigida a mamati kadagiti “post” iti Social Media pakaseknan iti panagraira ti novel corona virus.
Daytoy ket kalpasan nga adda ti nagwaras iti Social Media nga addan ti kumpirmado a kaso ti NcoV ditoy Ilocos Norte.
Pakaseknan iti daytoy, kiniddaw ni Senior Board Member Dr. Medeldorf Gaoat nga ilawlawag ni Dr. Racelis no ania ti nasao a virus.
Kiniddaw pay ni Bise Gob. Cecilia Araneta Marcos kadagiti kameng ti Media iti Kapitolio Probinsial nga pakaammoan ti publiko nga awan ti rumbeng a pagdanag ken saan nga ag-panic.
Gapu iti daytoy inlawlawag ni Dr. Racelis a ti NcoV ket baro laeng a naduktalan a virus isu a naawagan daytoy a novel.
Inpakaammona a mabalin a maakaran ti nasao a virus iti uneg ti 15 na minutos no ti tao a kasarsarita ket addaan iti virus ken iti kaadayo a dua agingga iti tallo a metro.
Inlawlawag na a masapul a dumalan ti incubation period iti uneg ti 2-14 nga aldaw rason a dagiti Person’s Under Investigation (PUI) ket maysa kadagiti criteria ket ti history of travel iti uneg ti 14 nga aldaw tapno makita ti senyales ken sintomas ti nasao a sakit.
Inpalgakna a kaadduan kadagiti pasiente ket makarikna ti gurigor, uyek ken panateng.
Inpakaammo ni Dr. Racelis nga adda ti dua a kumpirmado a naapektaran ti coronavirus ditoy pagilian no sadino maysa kadagitoy ket pimmusay.
Inbatadna nga idi damo na ket nabayag ti resulta ti Confirmatory Test ngem sipod idi Enero 31 ita a tawen ket addan ti nakasagana a kits iti Research Institute of Tropical Medicine (RITM) idiay Alabang.
Inlawlawagna a no kas bilang adda am-ammo a PUI ket ipakammo laeng ti Provincial Health Office wenno iti kaasitgan nga hospital.
Inpakaammo pay ni Dr. Racelis a ti Regional Epidemiology ken Surveillance Unit iti rehion ti mangi-refer iti aniaman a kaso ti NcoV iti RITM.
