LAOAG CITY – Mamati ti maysa nga agpanpanday linteg a saan nga umdas ti ‘enforcement’ ti ‘anti-drug policy’ tapno matuldukan ti problema iti ilegal a droga.
Segun ken ni Marikina 1st Dist. Rep. Marcy Teodoro, kasapulan met a matutukan ti prevention, treatment, rehabilitation ken reintegration.
Inpetteng na a saan nga udas ti panangipatungpal ti seryoso a pagannurutan, no di ket kasapulan a masolusyunan pay dagiti pasamak sakbay nga agtungpal iti adiksyon, ken karaman ti panagsubli iti pamilya kalpasan a dumalan iti rehabilitasyon.
Innayon na a saan a rumbeng a ti laeng pananglaban kontra iti illegal a droga no di ket kasapulan pay nga ikkan ti importansya dagiti ramot ken kasapulan iti treatment ken dadduma pay.
Inrakurak na daytoy kalpasan ti panangisponsor na ti nailungalong a nasurok a 500-milyon a pisos a pondo ti Dangerous Drugs Board para iti 2027, naipalaon iti panangilatang ti pondo iti Drug Abuse and Prevention Program.
Innayon na a napateg ti panagsukisok ti evidence-based policymaking iti panangbayabay ti gobierno a maestablisar no kaanu ti kangrunaan a panagkasapulan ti treatment ken community-based programs.
