LAOAG CITY – Naglikudan ni Miss Blenda Almo, ti Market Master iti Laoag City Public Market and Commercial Complex ti akusasyon kenkuana a naidanun iti Bombo Radyo Laoag.
Daytoy ket mainaig iti maipagarop a pannaki-bibiang na iti eleksyon para iti panagpili dagiti aglaklako kadagiti baro nga opisyal iti merkado publiko ditoy ciudad ti Laoag.
Inpetteng na a saan a makibibiang no di as-asistiren na laeng dagiti maseknan kas ina iti merkado publiko.
Kabayatanna, inkalintegan ni Almo a no maipapan iti Christmas party iti tiendaan ket kalikagom na laeng a makipartisipar amin nga aglaklako kas panangipakita iti panagkaykaysa da iti panangrambak ti paskua.
Innayon na a ti mailungalungalong a Christmas party a kalikagom na a pakipartisiparan amin nga aglaklako iti merkado publiko ket maysa a pakariknaan ti anag ti paskua.
