LAOAG CITY – Kiniddaw ni Market Master Totsie Ilaga ti kooperasyon dagiti aglaklako iti merkado publiko iti San Nicolas, Ilocos Norte.
Inbatad na nga agbalin koma a responsable dagiti aglaklako kadagiti basura ken amin nga usaren da nga aglako iti tiendaan ti nasao nga ili.
Kuna na a ti maysa a makaigapu no apay nga agbarado ti pagayusan ti danom ket gapu kadagiti supot ken dadduma a basura a saan a maikkat kadagiti ibelleng dagiti maseknan a danom.
Innayon na a masapol a dalusan dagiti aglaklako dagiti pwesto da tapno saan nga umado dagiti insekto ken awan ti agbalin a problema iti merkado publiko iti ili ti San Nicolas.
