LAOAG CITY – Manamnama nga imbitaran ti Sang. Panlungsod ditoy ciudad ti Laoag ni Mrs. Julie Anne Quiroga, market master iti Laoag City Commercial Complex.
Daytoy ket mainaig iti maipagarop a panaglako da ti bingo card kadagiti aglaklako iti nasao a merkado publiko.
Namunganay daytoy iti pannakaidanon ti reklamo iti Sang. Panlungsod partikular kenni Hon. RJ Fariñas.
Inrakurak met ni Fariñas iti priviledge speech na a dagiti aglaklako ket maobligar a gumatang ti bingo card nga agbalor ti 150 a pisos.
Nupay kasta naminpinsan a naglikudan daytoy ni Quiroga ken inbaga na a nakasagana da a dumatag iti konseho.
Segun kenkuana, awan ti pinnilitan iti panaglako da ti binggo card ken uray dagiti lakwan da.
Awan met ti makita na a nasalungasing iti inaramid da gapu ta adda permit ti fast food chain iti panagpa-bingo da manipud iti Dept. of Trade and Industry (DTI) ken ti panangusar da ti 3rd floor ti tiendaan gapu ta pinalubusan ni Mayor Michael Marcos Keon.
