LAOAG CITY – Maysa a marketing agency idiay Tokyo, Japan ti mangipapaay ti six days paid vacation leave kadagiti empleado a saanen nga agsigarilio iti trabahoda.
Nangrugi ti naidumduma nga incentive ti Piala Inc. idi adda ti maysa nga empleadoda ti agrekreklamo iti cigarette break ti kompaniada.
Segun iti nasao nga empleado, makapaperdi iti productivity-da ti cigarette break gapu ta ti opisinada ket adda iti maika-29 a kadsaaran idinto ti smoking lounge ket adda iti basement ti building.
Dumanon iti 15 a minuto dagiti empleado nga smokers sakbay a makasubli iti 29th floor ken maperdina ti work flow dagiti amin a tao iti opisina.
Idi makadanon daytoy iti Chief Executive Officer ti kompania a ni Takao Asuka, naammiris daytoy nga adda ti punto ti reklamo ti empleado ngem saanna met a mabalin nga ikkaten ti cigarette break dagiti empleado gapu ta karebbenganda daytoy isu a napanunutanna nga ikkan ti incentive dagiti saan nga agsigarilio iti oras ti trabaho.
Gapu iti daytoy, inrakurak ti kompania a dagiti empleado a saan nga agusar ti cigarette break ket maipaayan ti six days paid vacation leave.
Napanunutanda pay a napintas a wagas daytoy tapno agsardengen dagiti empleadoda a permanente nga agsigsigarilio para iti salun-atda.
Para iti salun-at ti komunidad, sumagmamano a kompania idiay Japan ti umig-iget ti panangipatungpalda iti smoking policies.
