LAOAG CITY – Addan anggulo a sursuruten ti PNP-Pasuquin seknan iti napasamak a pammaltog a nakatayan ni Rolando Salvador ken nakasugatan ni Mary-Ann Valenzuela agpada a residente iti Bgy. 15 Pangil ti nasao nga ili.
Daytoy ti inbatad ni P/C/Insp. Joseph Baltazar, Hepe ti Pulisya ti nasao nga ili.
Segun kenkuana, maysa kadagiti kitkitaen da a motibo ket “old grudge”.
Saan met a makunpirmaran ti Hepe no adda pannakainaig ti “love triangle” gapu ta masansan a makitkita nga agkuykuyog ti natay ken ti nasugatan.
Inpetteng na nga awan pannakainaig na ti napalabas a Bgy. Eleksiyon iti laksid a kimmandidato ti kabsat ti natay ngem naabak.
Innayon na nga adda da metten dagiti maal-alaan da kadagiti impormasyon ket umungen dagitoy ken pagkukunnektaren no ania kadagitoy ti kaasitgan nga agngulo a nangpapatayan da ken ni Salvador.
Maipalagip a nagsagaba ti tama ti paltog kadagiti nagduduma a paset ti bagi ni Salvador idinto a ni Valenzuela ket nagsagaba met ti maysa a tama ti paltog iti boksit na ken dimmalanen ti operasyon bayat nga agawiden dagitoy a nakalugan ti motorisiklo iti paset ti Bgy Ngabangab ti nasao nga ili a nagggapu a nagdalos ti mula a sili.
Mamapati a kalibre 45 ti nausar a klase ti paltog basar kadagiti narekubre a kapsula iti “crime scene”.
