LAOAG CITY – Plano ti Indonesia a maiyawid ni Mary Jane Veloso ditoy Pilipinas inton Enero.
Segun ken ni Senior Minister Yusril Ihza Mahendra, karaman kadagiti maibilang nga high-profile detainees ni Veloso a naisalakan manipud iti pannakabitayna kaduana dagiti nabatbati pay a miembro ti “Bali Nine” ti Australia nga agpapada a napilaan ti kaso iti droga idi 2005.
Inrakurak ni Yusril iti napalabas a tawen nga inaprobaran ni Presidente Prabowo Subianto ti pannakaiyakar ni Veloso ditoy pagilian.
Maipalagip a saan a natuloy ti panakabitay ken ni Veloso idi 2015, lima a tawen kalpasan a naarestar gapu iti iggemna a maleta a naglaon ti 2.6 kilo ti heroin.
Naipadamag a dua kadagiti “Bali Nine” gang ti binitay babaen iti firing squad, maysa ti pimmusay gapu iti cancer ken maysa meyt ti winayawayaan idi 2018.
Iti agdama, manarimaan ti pannakikoordinar ti Indonesia iti Paris maipanggep iti posibilidad nga iyakar ti France national a saanen a nainaganan pay.
