LAOAG CITY – Ibilang ni Mary Jane Veloso a milagro ti plano a pannakaiyakar kenkuana manipud iti pagbalodan idiay Indonesia a maikabil ditoy Pilipinas.
Daytoy ti inpakaammona iti kaunaan a pannaki-uman ken ni Veloso sipod idi nagpirma ti Pilipinas ken Indonesia ti katulagan iti napalabas a lawas para iti naan-anay a panagawidna ditoy pagilian.
Inbatadna nga apaman a makariing isuna iti bigat, panpanunotenna dagiti kalikagumna iti biag nga awan ti kasiguradoan.
Gapu iti daytoy, kunana a kanayon ti panagkararagna iti Dios a maikkan isuna ti maysa pay a gundaway a makaawid iti pagtaenganda ken makadenna ti pamiliana.
Inlawlawagna a sipod idi naammoanna ti damag, napalaos ti ragsakna gapu ta kalpasan ti 15 a tawen, makaawiden ditoy pagilian ken iti pamiliana a nabayagen nga arapaapna a makita.
Kuna ni Veloso a masapol nga isaganana ti bagina a mentally ken physically tapno sangoen ti amin pakairamanan ti pamiliana.
Maipalagip nga iti napalabas a lawas, inbatad ni Indonesia senior law and human rights minister Yusril Ihza Mahendra a napirmaan ti maysa a practical agreement iti nagbaetan ti gobierno ti Pilipinas ken Indonesia para iti repatriation ni Veloso.
Manamnama a makaruar ni Veloso inton Disiembre 20 sakbay nga agpaskua ken ti pannusana a dusa a patay ket maipababa iti pannakaibalodna iti tungpal-biag.
