LAOAG CITY – Manamnama a sumangpet ni Mary Jane Veloso iti Pilipinas ita a lawas kalpasan ti 14 a tawen a pannakaibalud na idiay Indonesia.
Daytoy ti kinumpirmaran ni Department of Foreign Affairs (DFA) Undersecretary for Migrant Workers Affairs Eduardo de Vega.
Segun ken ni de Vega, nagbiyahen idi rabii dagiti personnel ti Department of Foreign Affairs, Bureau of Corrections (BuCor), ken ti National Bureau of Investigation (NBI) a nagturong idiay Jakarta para iti pannakaiproseso ti pannakaiturnover ni Mary Jane iti Pilipinas.
Immunan a nairakurak a naiyakaren ni Mary Jane iti pasilidad iti Jakarta, Indonesia tapno mairugin ti proseso para iti pannakaiyakar na iti Pilipinas.
Maipalagip nga agturong koma idiay Indonesia ti pamilya Veloso, karaman ti abogado na ken sumagmamano nga opisyal ti gobierno idi domingo tapno bisitaen ni Mary Jane ngem saan da a natuloy gapu ta saanen a maipalubos nga adda ti bumisita kenkuana.
Ni Mary Jane Veloso ket nakunviktaran ti drug trafficking idi 2010, ken naikabil daytoy iti death row idiay Indonesia iti agarop maysa a dekada.
Kabayatanna, possible nga ipaayan ni Presidente Ferdinand Marcos Jr. ti pardon wenno agtungpal iti tungpal biag a pannakabalud ken ni Veloso apaman a maiyawid ditoy Pilipinas gapu ta awan ti dusa a patay iti pagilian.
Agtultuloy met ti panagapela ti kampo ni Mary Jane ken ni Presidente Marcos tapno ipaayan ti clemency kalpasan a mapalubusanen nga agawid ditoy Pilipinas.
