LAOAG CITY – Nagkiddaw iti gobierno ti Pilipinas ni Mary Jane Veloso, ti Pinay a pinatawan iti sabali a pagilian iti kaso a drug trafficking nga ipaayan isuna ti pannakawayawaya tapno mataripato dagiti nataenganen a nagannakna ken dagiti annakna kalpasan ti 16 a tawen a naisina daytoy.
Iti suratna nga inparuk-at ti Migrante International, inbatad ni Veloso nga awan ti sabali a kiddawna no diket makadua manen ti pamiliana ken iparikna kadagiti annakna ti panagayat ti maysa nga ina.
Inpeksana ti rigat dagiti nagannakna nga agbibiahe manipud idiay Nueva Ecija ti 8 agingga iti 10 nga oras tapno laeng bisitaen isuna pakairamanan ti gastos iti plete ken taraon.
Inpettengna a kalpasan ti maysa a tawen sipod idi naiyakar isuna ditoy Pilipinas, nagtalinaed latta daytoy a nakabalud uray awan ti inaramidna a basol.
Immapela ni Veloso ti agtultuloy a suporta tapno patgan ti pannakawayawayana.
Ni Veloso ket agdama a nakabalud iti Correctional Institution for Women idiay Mandaluyong kalpasan nga inyakar daytoy manipud idiay Indonesia nga agturong ditoy Pilipinas.
Nagpaut ti 15 a tawen iti pagbaludan ken ti dati a nasentensiaan ti dusa a patay ket sinukatan idi 2015 gapu iti apela ti gobierno ti Pilipinas.
