LAOAG CITY – Inpakaammo ni Dr. Liza Marie Paz – Tan, Dermatologist iti Mariano Marcos Memorial Hospital and Medical Center ti panagadu dagiti pasiente ti Diabetes.
Segun kenkuana, sumagmamano kadagiti rason ti iti kastoy a klase ti sakit ket ti masansan a pannangan iti ruar ken ti kinakurang ti ehersisyo iti bagi dagiti tattao.
Kinunana a ti sakit a diabetes ket in-inot a mangdaddadael iti salun-at ti maysa nga indibidual a mabalin a mangitunda ti pannakaputed ti saka, panag-dialisis wenno pannaka-stroke.
Nupay kasta, inbatad ni Tan a daytoy a klase ti sakit ket mabalin a maliklikan ti nakaro nga epektona ngem masapol ti nasapa a pannakaammo sakbay pay daytoy a ma-diagnose kas diabetes.
Inpanagetgetna a masapol ti pannaka-ammo kadagiti paglasinan sakbay pay daytoy a ma-diagnose ti diabetes.
Mainaig iti daytoy, inpettengna a maysa kadagiti mabalin a paglasinan iti maysa a pasiente nga adda iti early stage ti Diabetes ket mabalin a mailasin iti kudil ti maysa a tao babaen kadagiti nagduduma a klase ti impeksion iti kudil a narigat a malaingan.
Gapu iti daytoy, inpakaammona a no makapasar ti maysa nga indibidual kadagiti impeksion kas ti narigat a panaglaing ket insigida nga agpakonsultar iti doktor tapno insigida a maamon no adda pakainaiganna ti nasao nga impeksion iti sakit a diabetes.
Inpettengna a no mabalbalin ket liklikan ti publiko ti panangtulad kadagiti makit-kita iti online a nagduduma a wagas a panagagas kadagiti saksakiten iti kudil.
Kabayatanna, kinunana no ti maysa nga indibidual ket agar-aramat kadagitoy a wagas, no sadinno a saan pay a nalaingan iti dua a lawas ket inpettengna a natiptipid laengen ti panagpakonsultar iti doktor kumparar iti panangsurot kadagiti mabuybuya iti online.






