LAOAG CITY – Inlawlawag ni Professor Cristine Lim, maysa a Psychologist, dagiti possible nga epekto ti social media kadagiti agtutubo.
Daytoy ket mainaig iti tarigagay ti Kongreso a mangputar kadagiti gakat seknan iti pannakasalwad ti mental health dagiti agtutubo ken dadduma pay.
Kuna na nga adda dagiti positibo nga ipaay ti social media kadagiti agtutubo kas iti pannakakita kadagiti kabagyan da nga adda iti sabali a lugar babaen ti video call ken dadduma pay nga impormasyon a maiyannatop para kadagiti agtutubo.
Adda met ti negatibo nga ipaay ti social media kadagiti agtutubo kas iti pannakaparnuay ti stress, anxiety, saanen a makilangen-langen kadagiti pada nga ubbing iti ruwar, makaparnuay ti uncontrolled movements ken dadduma pay.
Segun kenni Lim, awan ti direkta a panagadal no anya ti ad-adu kadagiti nagpasara iti negatibo ken positibo nga epekto ti social media kadagiti agtutubo.
Nupay kasta, nasken a maipaayan ti importansya dagiti negatibo nga epekto na gapu ta amin ket awan ti mangayat nga agpasar iti daytoy.
Inbunannag ni Lim a babaen ti impluwensya ti pamilya, iti eskwela ken kadagiti mangisursuro ket maipaayan ti napintas a pannakamuli dagiti agtutubo nupay addaan iti social media.
Kuna na a nasken nga ipasagepsep dagiti nataengan kadagiti agtutubo ti nasayaat nga adal tapno saan da a maigamer iti panagusar ti social media para iti bukod da a ragsak ken dadduma pay nga impluwensya.
Innayon ni Lim a nasken a makita dagiti ar-aramiden dagiti agtutubo iti social media ken malimitaran ti panagusar iti daytoy, ken adda pay dagiti application a mabalin nga aramaten a maiyannatop kadagiti ubbing.
