LAOAG CITY – Inbalakad ni ABC Presidente Joseph Ulit iti ciudad ti Batac kadagiti pada na nga opisyal ti barangay a masapol nga itultuloy da ti agtrabaho a naimbag.
Reaksyon daytoy ni Ulit kalpasan a pinirmaanen ni Presidente Rodrigo Duterte ti linteg mainaig ti pannakaitantan ti Barangay ken SK Elections a maisayangkat koma iti 2020.
Iti eksklusibo nga interview ti Bombo Radyo Laoag ken ni Ulit, inbatad na a saan da koma a sayangen ti gundaway a naipaay kadakuada tapno maitultuloy da ti tarigagay da nga agserbi iti bukod da a barangay.
Innayon ni Ulit nga usto laeng ti pannakaitantan ti eleksyon ken pannakaiyatiddog ti termino da gapu ta ti tallo a tawen ket kurang para iti panangipatungpal da kadagiti proyekto a kayat da nga aramiden.
Mainaig iti daytoy, nagyaman ni Ulit kada Senador Imee Marcos ken Senador Bong Go gapu ta dagitoy ti kangrunaan a nangitandudo ti pannakaitantan ti nasao a panagpipili.
Gapu iti pannakaitantana na, maisayangkatton ti Barangay ken SK eleksyon intono 2022.
