LAOAG CITY – Inpetteng ni LMP President ken Dingras Mayor Erdio Valenzuela a masapol nga isubli ni Bernie Lazo alyas “Bayaw” ti inted da a 100 a ribo a pisos a reward kenkuana.
Daytoy ket kalpasan a plano na nga ibabawi dagiti nagbalin a testimonya na kontra ken ni Mayor Jessie Ermitanio nga intudo na a mastermind iti pannakatay ni Marcos Mayor Arsenio Agustin.
Segun kenni Valenzuela, bukod a kapanpanunutan ni Bayaw ti desisyon na ken saan da a mapilit daytoy iti plano na nga addang mainaig ti nasao a banag.
Nupay kasta, makapungtot ni Valenzuela gapo ti pananglukluko ni Bayaw ti sibubukel nga LMP seknan ti pannakatay ti dati a mayor.
Mainaig iti daytoy, kuna ni Valenzuela nga idi nagibutaktak ni Bayaw ket dinayaw na pay daytoy gapo ti kinatured na a nangitudo iti mastermind.
Inbatad ti mayor a ti gapo ti panangited da kenni bayaw ti nasao a kantidad ket gapo ta isuna ti nakaipaay ti impormasyon ngem gapo ta ibabawi na ket awan ti serbi na.
Innayon ni Valenzuela nga iyuman nan to met laeng daytoy a desisyon na kadagiti pada na a mayor ditoy probinsya.
