LAOAG CITY – Masapol nga adda ti criteria dagiti botante a pangibasaranda iti panangpili kadagiti kandidato para iti mapaspasangasangan a 2025 Midterm Elections.
Segun ken ni Prof. Dennis Coronacion, maysa a Political Analyst, saan laeng a ti pannakaiyendorso dagiti kandidato ti pangibasaran ti panangibutos kadakuada no di ket nasken a kitaenda a naimbag no dagitoy ket competent, qualified, adda ti pusona iti public service ken awan ti nakairamramananna nga isyu kas ti corruption.
Inbatadna a napintas no adda ti baro a rupa ngem addaan ti potensyal nga agbalin a lider gapu ta kaadduan kadagiti manamnama nga agpaidasig iti eleksion ket manipud met kadagiti political families.
Inlawlawagna a nakaladladingit dagitoy a pasamak gapu ta malimitaran ti pagpilian dagiti botante gapu iti kinaadu dagiti kandidato nga aggapu kadagiti mabigbigbig a pamilia iti lubong ti pulitika.
Mainaig iti daytoy, ginutigot ni Prof. Coronacion dagiti botante a pilien dagiti kandidato a saan pay nga am-ammo ti kaadduan a tattao tapno mabalbaliwan ti taray ti pulitika ditoy pagilian.
Innayon ti Political Analyst a dagiti agpaidasig a kandidato ket masapol nga ammoda a solbaren dagiti kangrunaan a problema a sangsangoen iti agdama ti pagilian kas ti panagbisin, kinaawan ti pagtrabahoan, kinangina dagiti magatgatang kangrunaanna kadagiti basic goods ken dadduma pay.
