LAOAG CITY – Masapol nga adda ti legal basis wenno linteg a maipasa para iti pannakaipawil a rumuar dagiti tattao a saan pay a nabakunaan kontra iti covid-19 ditoy pagilyan.
Daytoy ti inbatad ni Atty. Bernie Constantino, ti dati a presidente ti Integrated Bar of the Philippines (IBP), Laoag City-Ilocos Norte Chapter.
Rakurak daytoy ni Constantino kalpasan nga inbilin ni Presidente Rodrigo Duterte kadagiti amin a kakapitan iti intero a pagilyan a saanda a paruwaren dagiti residente iti masakupan da a lugar no saanda pay a nabakunaan kontra iti covid-19.
Inpetteng na nga uray ipatungpal ti gobierno ti makunkuna a police power a para iti seguridad, salun-at ken pagsayaatan amin a tattao ket kasapulan latta nga adda ti maputar a linteg para iti daytoy nga addang.
Inpalgak na a no awan ti linteg a maaramid ket adda ti agbalin a problema.
Innayon ni Constantino a no bilang awan ti maputar a linteg ket nasaysayaat no mangipasa ti kada Local Government Unit (LGU) ti ordinansa para iti kalikagom ti presidente.
Kabayatanna, inbatad ni Constantino a para kenkuana ket kasayaatan no agpabakuna amin a tattao agingga iti booster shot tapno masigurado a nataltalged kontra iti makapatay a virus.
Mainaig iti daytoy, iti met pananginterview ti Bombo Radyo Laoag ken ni Doctor Charito Malicad, ti Information Officer iti gobierno lokal ditoy ciudad ti Laoag ket inbatad na a masapol nga adda ti legal a pagibasaran sakbay a maipatungpal ti kalikagom ni Presidente Rodrigo Duterte.
