LAOAG CITY – Inlawlawag ni Atty. Redentor Saguigit, maysa a Law Practitioner a masapol ti 2/3 a butos manipud kadagiti 24 a Senador iti Senado tapno naan-anay a ma-impeach ni Vice President Sara Duterte.
Segun kenkuana, kalpasan ti pannaka-impeach ti Bise Presidente iti Kongreso ket maipangato daytoy iti Senado no sadinno dagiti amin a Senador nga agdama a nakatugaw ket addaan ti bileg a mangiyetnag ti desision maipanggep iti impeachment trial.
Inbatadna a dumalan iti naiget a panagadal dagiti amin nga ebidensia a maidatag iti Senado nga isu ti pangibasaranda para iti pannakapadisi iti puesto ti Bise Presidente.
Inlawlawagna a maysa kadagiti kangrunaan a matingiting ket dagiti naglabas a tignay nga inaramid ni Vice President Sara kas ti panangipangtana kada Presidente Ferdinand Bongbong Marcos Jr., First Lady Liza Araneta Marcos ken House Speaker Martin Romualdez.
Innayonna a no maipursige ti pannaka-impeach ti Bise Presidente ket adda ti bileg ti Presidente nga agpili daytoy manipud kadagiti miembro ti Kongreso ken Senado tapno agbalin a sumaruno a maikadua a kangatoan nga opisial ti pagilian.
