LAOAG CITY – Inpakaammo ni Provincial Veterinarian Dr. Loida Valenzuela nga adu pay dagiti masapol nga aramiden ti probinsia a panagsagana sakbay a maipalubos manen ti panagtaraken ti baboy kangrunaanna kadagiti lugar a naapektaran ti African Swine Fever wenno ASF virus ditoy probinsia.
Segun kenkuana, paset daytoy iti kalikagum ti Gobierno Probinsial a maisagana a naimbag ti probinsia para iti baliw a pannakairubuat ti panagtaraken ti baboy kadagiti amin nga ili ken siudad ditoy probinsia.
Kunana a tumultulong ti gobierno probinsial a mangikarigatan a mangpaalisto iti pannakaipalubos manen ti panagtaraken ti baboy kadagiti lugar a naapektaran ti ASF itay kallabes.
Mainaig iti daytoy, inpakaammona a naipaayan dagiti City/Municipal Veterinary Office iti nagduduma nga ili ken siudad ditoy probinsia ti power sprayer, knapsack sprayer ken disinfectant.
Inbatadna a nairaman pay a naipaayan dagiti uppat nga ili a saan a naapektaran ti ASF a pakaibilangan iti ili ti Adams ken Pagudpud. Kunana a ti napateg ket nangipaayen ti gobierno nasional kangrunaanna iti Bureau of Animal Industry a pagalagadan para iti pannakaipalubus manen kadagiti lugar a naapektaran ti ASF nga agtaraken ti baboy.
Pakaseknan daytoy, inpagunamgunam ti provincial veterinarian kadagiti maseknan ti panangipatungpalda wenno panangkumpletoda kadagiti dokumento saan laeng nga iti sentinel program, disinfection ngem amin a requirements ti gobierno nasional.
