LAOAG CITY – Masapol ti naparpartak a panagtalidtid ti kaso tapno dagus a magun-od ti hustisia ditoy Pilipinas.
Daytoy ti nabagas a sarita nga inibbatan ni Atty. Chel Diokno, ti maysa nga Human Rights Advocate ditoy pagilian.
Segun kenkuana, nasken nga ipangpangruna ti gobierno ti panangikagumaan ti alisto a pannakaipaay ti hustisia kadagiti maseknan agsipod ta adda ti panagkurang iti sistema ti pannakaipatungpal ti linteg ditoy pagilian.
Inbatadna a bumabbaba ti panagtalek dagiti Pilipino gapu iti naginad a panagtalidtid ti kaso ditoy pagilian banag a daytoy ti tutukan ti gobierno.
Iti baet daytoy, inpakaammona nga adda ti naiyuswat a wreath-laying ceremony kas paset iti maika-38 nga anibersario ti Epifanio de los Santos Avenue People Power Revolution no sadino kaduada a nagatendar ket ti National Historical Commission, Human Rights Victims Memorial Commission, Bantayog ng mga Bayani ken dadduma pay a grupo.
Inlawlawagna a masapol a maisubli ti panagwaywayas ti pagilian para iti panagkaykaysa dagiti Pilipino nangruna iti agdama nga henerasion.
Kunana a ti Epifanio de los Santos Avenue People Power Revolution ket kas resulta ti panangilaban ti panagwaywayas ken karebbengan dagiti tattao nga isu nangitunda ti pannakaputar ti baro a konstitusion ditoy pagilian a manarimaan a maipakpakat.
Inpalgakna nga agtawen daytoy ti 11 idi naideklarar ti Martial Law ket ditoy a naimatanganna mismo dagiti napaspasamak iti nasao a panawen kas ti panaglabsing kadagiti karebbengan dagiti tattao, panagabuso iti bileg ti turay ken dadduma pay.
Mainaig iti daytoy, maladingitan ni Atty. Diokno ti gagem ti Historical Revisionism a panangbalbaliw ti pakasaritaan ti pagilian idi kangitingitan ti pannakaipatungpal ti Martial Law.
Ibilangna a dakkel a pammadayaw para kenkuana iti pananglagip ti Epifanio de los Santos Avenue People Power Revolution nangruna ket inbalodda ti amana iti dua a tawen nga awan ti kasona ken awan pay ti naiserbi a warrant of arrest daytoy.
Innayon ti Human Rights Advocate a dakkel a pannubok ken ni Presidente Ferdinand Bongbong Marcos Jr. ti kalikagum a pannakabalbaliw ti 1987 Constitution.
