LAOAG CITY – Indagadag ti Department of Transportation Sec. Jaime Bautista ti maritime sector tapno maitunos dagiti proyektona kadagiti proyekto ti gobierno tapno masalakniban ti marine environment.
Kinuna ti sekretario a masapol nga agbalin a “collective” dagiti proyekto proyekto para iti pannakaprotehir dagiti marine resources ti pagilian.
Mainaig iti daytoy, kasapulan a sangsangkamaysa a salakniban ti maritime industry ken saan laeng a saggaysa wenno agsisina.
Kinunana a makapagtitinnulong dagiti amin nga ahensia ti gobierno, Philippine Coast Guard, Maritime Industry Authority, Philippine Ports Authority, ken nagdumaduma a non-government organizations (NGOs) para iti nadakamat a proyekto.
Ti Department of Transportation ket immuna a nangaramid kadagiti proyekto babaen ti Maritime Industry Development Plan (MIDP) 2028 a mangsuporta ti Blue Economy, maysa a konsepto a buklen ti natalged a panagusar kadagiti marine resources tapno mapasayaat ti pagbiag, ekonomia, ken urnos dagiti taaw ti pagilian .
Kabayatanna, indagadag ti sekretario a makikadua iti publiko iti conservation ken protection campaign nga inaramid ti gobierno ken nagdumaduma a grupo para iti taaw.
