LAOAG CITY – Kalikagum ni Atty. Cherry Grace Bareng, private counsel ni Forilan Suniga, ti preventive suspension ni Vice Mayor Francis Espiritu iti ili ti Dumalneg tapno saan na a maimpluwensyaan wenno makumbinsir dagiti testigo a pumabor kenkuana.
Daytoy ket seknan iti napasamak kabayatan ti implementasyon ti Enchanced Community Quarantine a maipagarup a nadangran ni bise mayor Espiritu ni Suniga idi sumrek iti ili ti Dumalneg a naggapu ditoy siudad ti Laoag.
Inlawlawag ni Bareng a ti preventive suspension ket saan a pannusa kontra iti bise mayor ngem ketdi paset iti imbestigasyon.
Iti naiyuswat ngai administrative case hearing iti Sangguniang Panlalawigan, kuna ni Bareng a naladaw ti panagsungbat ni Espiritu kalpasan a naawat na ti summon idi Hunyo 22 ita a tawen ken naikkan ti 15 nga aldaw a pawayway nga agsungbat.
Nagkiddaw ti maseknan iti motion for extension rason a naikkan da manen iti 10 nga aldaw nga agsungbat.
Kuna ni Atty. Bareng a naisumitir da ti sungbat idi Hulyo 22 agraman dagiti affidavit dagiti testigo.
Kinontra ni Atty. Ferdinand Ignacio, a naisumitir da ti sungbat iti umiso nga oras.
Naamuan nga Hulyo 19 ti naited a deadline ngem aldaw daytoy iti Domingo rason a naipan iti Lunes, Hulyo 20, nga isu ti inpetteg ni Ignacio a pannakaisumitir ti sungbat da.
Nupay kasta, kinontra met dagiti testigo ni Suniga ti judicial affidavit iti bangir a partido gapu ta saan nga agpada ti lokasyon idi napirmaan ti judicial affidavit iti ili ti Paoay idinto a naaramid ti surat ditoy siudad ti Laoag.
Inbunannag pay ni Atty. Bareng a nagsagaba ni Suniga ti physical injury secondary to mauling basar iti medikal ngem kinontra ni Atty. Ferdinand Ignacio a saan a kayat a sawen a no nagsagaba iti physical injury secondary to mauling ti maseknan ket ni Bise Mayor Espiritu ti akin aramid.
Adda pay ti manamnama a preliminary conference mainaig iti nasao a kaso, no nasken a mangipila dagiti maseknan ti motion to dismiss, motion to expand wenno motion to impose preventive suspension.
