LAOAG CITY – Kinumpirmaran ni Engr. Maria Venus Torio, distrcit engineer iti DPWH first engineering district, ti panangipadas ti INWAD ken Primewater dagiti naikali a tubo.
Daytoy ket mainaig iti natubtub a kalsada kangrunaan iti sango ditoy istasyon ti Bombo Radyo ken maipagarup nga adda dagiti dandani a madesgrasya gapu iti kinalawa na.
Kuna ni Torio a ti palawag ti INWAD ken Primewater kadakuada ket kasapulan a maipadas nga umuna dagiti naikali a tubo no adda iti tagas na wenno awan nupay naibilin na kadagiti maseknan iti panangsemento da nga insegida ti natubtub da a kalsada.
Inbatad na a possible nga umabot iti agarup dua a bulan sakbay a malpas da ti panagitesting iti intero a siudad ti Laoag.
Innayon ni Torio a ti nabakbak a paset iti shoulder ti kalsada ket masapul a sukatan da a sibubukel.
Ikarkarigatan nga alaen ti Bombo Radyo iti kabibiang ti INWAD ken Prime Water.
