LAOAG CITY – Nagkedked ti Mrs. Vilma Eda, Schools Division Supt. ti Dept. of Education ti Ilocos Norte a mangsungbat kadagiti reklamo dagiti nagpabigbig a maseknan nga empleyado ti nasao a dibisyon.
Ti laeng inbaga ni Eda kalpasan a ginandat ti Bombo Radyo nga alaen ti reaksiyon na ket nakasagana daytoy nga agsungbat no addanto pormal a reklamo a maawat na.
Inadmitir na a naunget ken dinillaw na iti kaadon a reklamo da kontra kenkuana ken ti kinaanos da a nangaramid kadagiti reklamo.
Basar iti naawat ti Bombo radyo a surat, umab-abot iti 15 ti bilang dagiti reklamo da kontra ken ni Eda.
Maibilang ditoy ti panangpatarimaan na ti bulding a paggigiyanan ti Assistant Div. Supt. Ken pakasarakan ti opisina ti Finance uray nabiit pay a natarimaan, maipagarup a panamagsasao na kadagiti emopleyado ti naalas a balikas uray basit laeng a banag ti pakabasulan da, igagatang na kadagiti agkakangina a kagamitan iti opisina na uray kabarbaro pay laeng dagiti nadanon na a gamit kas kadagiti tugtugaw gapu ta masapul ti kas iti 21st century nga opisina na ken dadduma pay.
