LAOAG CITY – Inbaga ni ABC President Elmer Verdadero iti ili ti Dingras a masikog ti pimmusay a ni IN-C3774, agtawen ti 43 ken residente iti Barangay Capasan iti nasao nga ili.
Inlawlawag na nga iti naukkon na nga impormasyon ket nagkapsot ti pasyente isut gapuna a naitaray iti ospital ngem naideklara a dead on arrival.
Kuna na nga iti pannakaeksamen ti pasyente ket naamoan a positibo daytoy ti covid-19 virus.
Saan met pay a madeterminar no nakaalaan ti pasyente ti makapatay a virus.
Nupay kasta, inpakaammo ni Verdadero a karruba ti pasyente ti baket a maysa a market vendor nga immuna a nagpositibo ti covid-19 iti kallabes.
Immun-una iti daytoy, pinirmaan ni Mayor Jeofrey Saguid ti maysa nga executive order (EO) No. 030 S. 2021 para iti pannakailockdown ti intero a Sitio 2 iti Barangay Capasan iti nasao nga ili.
Malaksid iti pimmusay a masikog ket adda pay ti agtawen ti 19 babai nga APOR a nagpositibo ti makapatay a virus a ti maibagbaga a nakaalaan na ket ni IN-C3338 a kaubraan na.
