LAOAG CITY – Manamnama a maisayangkat ti “mass oath taking” kadagiti amin a nangabak nga opisial ti Ilocos Norte iti masungad a Hunio 14.
Inpakaammo ni Gov. Matthew Marcos Manotoc a ti planoda nga awisen a mangpasapata kadakuada ket ni Pres. Ferdinand Marcos Jr.
Nupay kasta, inbatadna nga iti agdama ket saan pay a masinunuo no sadinno ti pakaisayangkatan ti nasao nga aktibidad.
Inlawlawagna a kalikagum ti sumaruno a Gobernador ti probinsia a ni Hon. Cecilia Araneta Marcos a Sabado ti panagsapatada gapu ta kalikagum dagiti kameng ti pamiliana ken gagayyemna a maimatangan ti panagsapatana nga aggapu idiay Zamboanga.
Kabayatanna, kuna ti Gobernador a manamnama met ti panagsapata ni Sen. Imee Marcos inton Hunio 12 a kaaldawan ti panagwaywayas ti pagilian.
