LAOAG CITY – Pudno ti pagsasao a ti kinarigat ti panagbiag ket saan a lapped tapno saan a maragpat ti aparaap kangrunaan na ti makaturpos iti panagadal.
Daytoy ti napaneknekan ni Dr. Geraldine Ortal Lao-at, Master Teacher II iti Cumcumraas-Manggaddi-Pitpitac Elementary School iti ciudad ti Batac.
Inburay ni Lao-at a dagiti nagannak na ket agpada a saan a nakaturpos ti panagadal gapu iti kinarigat ti panagbiag rason a ti kangrunaan nga inpagunam-gunam da kenkuana ken ti dua pay a kakabsat na ket masapol nga igaed da ti agadal, nga isu met ti inaramid da.
Inlawlawag ni Lao-at nga idi agad-adal ket ado a rigat ti nagpasaran na gapu ta napadasan na ti napan nagtrabtrabaho iti taltalon kas ti napan nagsikka, nagraep ken naggapas.
Kuna na a napadasan na pay ti napan nakiubon ti tabako tapno adda laeng ti nayun ti allowance na iti papanna iti pagadalan.
Nupay kasta, saan a nagbalin a tubeng dagitoy tapno maupay ken sumuko iti panagadal na no di ket ad-adda a pinagbalin na nga inspirasyon tapno makaturpos iti panagadal.
Nagyaman ni Lao-at gapu natungpal na ti arapaap na ken dagiti nagannak na a makaturpos iti panagadal no sadinno a nagturpos pay daytoy kas cumlaude.
Inpakaammo na a kalpasan a nakaturpos ket nagaplikar a dagus ti trabaho ken pagyamanan na gapu ta naawat daytoy a nangisuro iti kindergarten sakbay a naipermanente.
Innayon na a nagduduma a pagadalan ti nangisursurwan na ken naruayen nga ubbing, nagannak ken pada na a mangisursuro ti nakapulpulapol na.
Mainaig iti daytoy, kuna ni Lao-at a saan a nagpatingga iti panagbalin na laeng a mangisursuro isut gapuna nga intultuloy na ti nageskwela agingga a nagbalinen a Master Teacher II.
Kabayatanna, inbalakad ni Lao-at a masapol nga aniaman ti estado ti panagbiag masapol nga igaed ti agadal ken saan a liplipatan ti agkararag ken agkiddaw ti bendisyon ti namarsua.
Innayon na nga adda man ti honor wenno awan ket saan koma nga isu ti pakaupaayan tapno saan nga ipursige a turpusen ti panagadal.
