LAOAG CITY – Kinomendaran iti Sanguniang Panlalawigan dagiti estudyante a Mathletes iti Bacarra National Comprehensive High School a napan nakilaban iti Mathematical Olympiad idiay Macau, China
Daytoy ti kaunaan a gundaway a nakasali ti nasao a pagadalan iti mathematical Olympiad no sadinno a nakagun-od da ti maysa a silver medal ken tallo a bronze medal.
Inpeksa ti Sangguniang Panlalawigan ti panangipanakkel da kadagiti estudyante gapo ta nakaipaay dagitoy iti pakaidaydayawan iti probinsiya.
Mainaig iti daytoy, inpadanon ni Vice Governor Cecilia Araneta Marcos iti kinaragsak bayat ti panangkablaaw na kadagiti nadakamat nga estudyante.
Immunan a kinomendaran ti junta probinsyal dagiti estudyante a Mathletes iti Sarrat National High School a nakaipaayan ti ado a pammadayaw ditoy probinsya gapu iti panagbalin da a World Champion iti naiyuswat a World International Mathematical Olympiad idiay Kuala Lumpur, Malaysia idi Enero ita a tawen ken nagballaigi pay dagitoy iti the Guangdong – Hong Kong – Macao Greater Bay Area Mathematical Olympiad idiay Macao idi Marso ita metlaeng a tawen.
