LAOAG CITY – Nalukatanen iti publiko ti MATT Tower wenno ti “Mapagtalkan, Alisto, Addaan Tured ken Tarigagay nga Agserbi Tower” ti Ilocos Norte Police Provincial Office (INPPO) a masarakan iti Camp Valentin S. Juan.
Inbunannag ni Gov. Matthew Marcos Manotoc nga ipamatmat daytoy ti napasnek a panagtrabaho dagiti nangipasdek iti nasao a proyekto.
Maipalagip nga inatendaran ti Gobernador ti groundbreaking ti nasao a proyekto idi Marso 7 iti daytoy a tawen 2024.
Mangnamnama a babaen ti proyekto ket ad-adda pay a mapatibker ti napintas a panagkakammayet dagiti kameng ti Ilocos Norte Police Provincial Office.
Kabayatanna, kagiddan ti nasao nga aktibidad ket naisayangkat ti pannakabendisyon ken ti pannakaipaima iti Ilocos Norte Police Provincial Office dagiti Sports Utility Vehicle wenno SUV, motorsiklo, Search and Rescue wenno SAR equipment, Basic Assault Rifle ken communication Equipment.
Patien ni Gov. Manotoc a dakkel ti maitulong dagitoy para iti ad-adda pay a pannakapasayaat ti serbisio dagiti kameng ti pulisya.
Mainaig iti daytoy, impadanonna ti napalaus a panagyamanna iti Office of Civil Defense pakairamananda Sen. Imee Marcos, Cong. Ferdinand Alexander Marcos ken Cong. Angelo Marcos Barba iti panangipapaayda ti tulong kadagiti kameng ti pulisya ditoy probinsya.
