LAOAG CITY – Inaprobaran ti Sangguniang Panlungsod ditoy siudad ti Laoag ti dua nga ordinansa a nangipaay ti tricycle franchise to operate iti tricycle-for-hire babaen ti amnestiya wenno pammakawan.
Segun ken ni Konsehal Bryan Alcid, Chairman ti Committee on Transportation, ti Draft City Ordinance No. SP-2025-004 ket maibilang a maikadua a bansada a bukbuklen ti maymaysa nga indibidual idinto a ti Draft City Ordinance No. SP2025-005 ket adda ti 50 a benepisiario a maibilang a maikatlo a bansada.
Inbatadna a daytoyen ti maudi a bansada ti nasao a grupo a maipaayan ti gundaway a mapakawan gapu kadagiti iligal nga inaramid dagitoy kadagiti prangkisa a naipaima kadakuada gapu iti panangilako ken panangi-transfer ti nakanagan.
Inlawlawagna nga apaman ti pannnakaipasa dagitoy nga ordinansa ket kageddan met ti panangkablaaw kadakuada dagiti Konsehal tapno saanen a maulit pay ti inaramidda a maikanniwas iti paglintegan.
Maipalagip nga immunan nga inrakurak ti Chairman ti Committee on Transportation a namunganay daytoy nga ideya a pannakaipaay ti pammakawan kadagiti nagaramid ti saan a nainkalintegan kadagiti prangkisada babaen ti naipasa a City Ordinance NO. 2024-008 series of 2024 nga inisponsoran ti Committee on Laws.
Kabayatanna, naammoan a ti pakabuklan ket dumanon iti 151 ti inpaayan ti amnestiya iti Sangguniang Panlungsod ditoy siudad ti Laoag sipod idi nangrugi ti pannakaipatungpalna daytoy.
