LAOAG CITY – Sumangsango ita ti dakkel a karit ti Dallas Mavericks iti panangrugi ti Game 2 NBA Finals kontra iti Boston Celtics.
Malaksid nga iggem ti Celtics ti 1-0 a lamang ket iti homecourt-da pay ti pakaiyuswatan ti ay-ayam.
Dakkel met a karit ti Dallas ti kuestiyonable a panagay-ayam ti superstar-da a ni Luka Doncic.
Basar iti grupo a saanda pay a masinunuo no makaay-ayam daytoy gapu iti thoracic contusion malaksid pay iti right knee sprain ken ti ang-angalenna a left ankle.
Awan met ti nairekord ti Celtics nga umaayam nga addaan ti injury a mangipasimudaag nga amin dagitoy ket makaay-ayam iti Game 2.
Maipalagip a tinambakan ti Celtics ti Dallas idi Game 1 iti iskor nga 107-89 no sadino nga indauloan ni Jaylen Brown ti ay-ayam a nakaaramid ti 22 points, innem a rebounds, dua nga assists, tallo nga steals ken tallo a blocks.
Naammoan a ti Mavericks ket indauloan met ni Doncic nga addaan ti 30 points, 10 rebounds, maysa nga assists ken dua nga steals.
Kabayatanna, dakkel a kantiaw ti Mavericks idi Game 1 a nalimitaran laeng ti team assists-da agingga iti siam gapu iti naiget a depensa ti Celtics.
