LAOAG CITY – Inpasigurado ti Maynilad Water Services Inc. a nakasaganadan iti posible nga epekto ti El Niño kabayatan iti kritikal a panagbaba ti lebel ti danum iti Angat Dam.
Basar iti Maynilad, agtultuloy ti addangda tapno masigurado ti agtultuloy a suplay ti danum kadagiti consumers-da.
Naammoan nga uray pay nakatulong ti tudo gapu iti Bagyo Inday ken habagat tapno mabayag ti panagbaba ti danum ket agtultuloy latta ti panagsaganada para iti aniaman a posible a situasion.
Karaman ti addang ti Maynilad ti naan-anad a panangidaulo ti pressure line ti danum, panagusar ti regulating valves ken pannakipaset dagiti ahensia kas Department of Environment and Natural Resources (DENR), Metropolitan Waterworks and Sewerage System (MWSS) ken Philippine Atmospheric, Geophysical and Astronomical Services Administration (PAGASA).
Kabayatanna, inrakurak ni Maynilad spokesperson Jen Rufo, ad-adda a nakasaganada ita maidasig iti napalabas nga El Niño idi 2019.
Kunana nga ad-adu ti nayon a pagal-alaan ti danum, bumassit ti masaysayang a danum gapu iti panagsukat dagiti dati a tubo ken addaanda ti alternatibo a source kas Laguna Lake, reused water ken dagiti modular treatment plant-da.
Inbatad ti Maynilad a dakkel a tulong dagiti panagsagsagana iti daytoy tapno maliklikan ti posible a nakaro a kalgaw wenno kurang ti danum.
Basar iti Philippine Atmospheric, Geophysical and Astronomical Services Administration (PAGASA) a bimmaba ti lebel ti danum iti Angat Dam iti sumurok-kumurang 155 meters above sea level idi Hulio 15.
Nababbaba daytoy ngem iti naikeddeng a critical level nga 160 a metro ken adayo iti normal nga operating level ti dam.
