LAOAG CITY – Nangiparuk-at ti Executive Order (EO) ni Mayor Ferdinand “Kilo” Aguinaldo iti ili ti Pasuquin para iti pannakaipangato ti presyo ti live weight ken karne ti baboy, pakairamanan ti karne ti baka ken manok.
Daytoy ti inbatad ni Mr. Perdo Rex Aguinaldo, ti Executive Secretary iti lokal a gobierno iti ili ti Pasuquin iti baet ti agtultuloy a panagngato ti kaso ti African Swine Fever (ASF) virus ditoy probinsya.
Inlawlawag na nga immunan a nagtutulagan da kadagiti meat vendors a temporaryo a maipangato ti presyo dagiti nasao a produkto.
Innayon na a no umadon ti suplay ti karne ti baboy iti nasao nga ili ket mabalin nga ibabawi iti aniaman nga aldaw wenno oras ni Mayor Aguinaldo ti inparuk-at na nga EO.
Maipalagip a ti naudi a panaggaraw ti presyo ti karne ti baboy iti ili ti Pasuquin ket idi Abril 30, 2018.
