LAOAG CITY – Inpasingked ni Mayor Albert Chua iti Siudad ti Batac nga umad-adu dagiti aglaklako iti merkado publiko iti nasao a Siudad.
Inpakaammona nga umaboten iti nasurok tallo ribu dagiti lisensiado nga aglaklako iti uneg ti tiendaan malaksid pay kadagiti pasdek-negosio ken establishimento nga adda iti ruar ti tiendaan kas ti national highway ken provincial road.
Kunana a madlaw nga umad-adu ti bilang dagiti aglaklako iti tiendaan saan laeng iti aldaw mismo ti tienda iti Siudad ti Batac a tunggal Huebes ken Domingo no di ket pakairamananen ti ordinaryo nga aldaw.
Inlawlawagna nga adda pay dagiti naggapu iti sabali nga ili a nangipatakder ti puestoda iti nasao a Siudad kas ti paglakoan kadagiti construction materials, parts and services kadagiti lugan, water station, gasoline station ken dadduma pay.
Innayonna nga adda pay ti naiyestablisar a farmers’ lane iti tiendaan tapno ditoy a maikkan ti gundaway dagiti mannalon a mailakoda ti bukudda a produkto a saandan a masapol pay ti mangala ti permit para iti panaglakoda.
Kabayatanna, inbatad ni Mayor Chua a manarimaan ti panangisayangkat ti assestment ti Seal of Good Governance iti lugarda no sadino a babaen iti daytoy ket ditoy a naammoan ti naiget a panangsurotda kadagiti amin a naiyatnag a pagalagadan.
