LAOAG CITY – Nangited ti opisyal nga statement ni Mayor Albert Chua iti siudad ti Batac mainaig iti nagduduma nga health protocols.
Daytoy ket kalpasan nga adda ti maysa a post a mangkonkondenar iti local a gobierno ti siudad partikular iti Mayor.
Iti post, nailanad a maipagarup binugkawan ti mayor ti indibidual bayat nga agpatpatulong.
Karaman pay ditoy ti maipagarup a naladaw a pannakaiparuk-at ti resulta, awan ti umno a koordinasyon ti local a gobierno ti siudad, awan ti nadutukan a personnel ng mangipakaammo wenno mangkumpimar a positibo iti virus ti maysa nga indibidual, saan nga accurate a panagreport ti LGU ti Batac ken iti gobierno probinsyal kasta pay iti kinaawan ti food assistance kadagit naka-quarantine.
Segun ken ni Mayor Chua, ti ibagbaga ti nagpost iti social media a binugkawan na bayat nga agpatpatulong ket saan a pundo.
Inlawlawag na a ngimmato ti boses na gapu ta adda iti biyahe iti dayta a gundaway.
Mainaig iti daytoy, kuna na a namintallon a daras a nagpatulong ti maseknan ken awan ti gundaway a nagkedked ti gobierno lokal a nangsubat kadagiti arungaing na.
Innayun na a ti naladaw a pannakaiparuk-at ti resulta ti swab test ket saan a kontrol ti lokal a gobierno ken ti kopya a saan nga insegida a maited ket adda iti kontrol ti Mariano Marcos Memorial Hospital and Medical Center iti siudad ti Batac.
Kuna na nga adda met dagiti focal persons a mangkita kadagiti positibo iti virus ken adda ti koordinasyon ti siudad ken ti gobierno probinsyal.
Inpetteng ti Mayor a nu maipanggep iti kinaawan ti food assistance kadagiti apektado ti covid-19 ket saan a pudno agsipod ta sidadaan ti LGU a mangipapaay ti tulong .
Kabayatanna, inpakaammo ti Mayor nga awan ti rason a saan a matulungan ti maseknan nga indibidual gapu ta asideg met kenkuana daytoy.
