LAOAG CITY – Ad-adalen ti gobierno local dittoy ciudad ti Laoag no ituloy da ti pannakaiyimplementar ti 4-day work week.
Daytoy ti inbatad ni Mayor James Bryan Alcid kalpasan ti maysa a lawas a pannakaiyimplementar na.
Kuna ti mayor a basar iti obserbasyon na ket narigat nga ileppas dagiti trabaho dagiti empleado iti uneg laeng ti uppat nga aldaw, aglalo ket nagduduma a serbisyo ti ipapaay da.
Nupay kasta, inlawlawag na a gapu ta adda ti pammilin ni Presidente Ferdinand Marcos Jr. Ket masapol a sumurot da kas solusyon iti agtultuloy a panagngato ti presyo dagiti produkto a petrolyo ken tapno makainot ti kuryente.
Innayon na nga adalen na a naimbag no epektibo daytoy nga addang agingga ita a lawas, ngem no saan ket isubli da metlaeng ti lima nga aldaw nga iseserrek dagiti empleado ti gobierno lokal ditoy ciudad ti Laoag, a ti laengen aramiden da ket ti naan-anay a panaginot ti kuryente.
