LAOAG CITY – Balligi ti panagreport ni Mayor James Bryan Alcid kadagiti nagapwanan na iti uneg ti 100 nga aldaw a panagtakem na kas ama ditoy ciudad ti Laoag.
Immuna a nagyamanan ni Mayor Alcid dagiti stakeholders, barangay officials, opisyales iti gobierno probinsyal, nagduduma nga institutions kas kadagiti pagadalan, Non-Government Organizations ken dadduma pay a sektor ken grupo gapu ta patienna a saanna a naipatungpal dagiti programa ken proyekto na a pagsayaatan dagiti umili ditoy ciudad no awan dagitoy.
Iti panagbitla ti mayor, inbatad na nga apaman a nagtugaw iti pwesto na ket insigida a nangipasa ti Executive Order para iti pannakaadaptar ti “Alisto Asenso Progreso Tagline” kadagiti amin a programa ken proyekto a maipatungpal ditoy ciudad ti Laoag.
Inpakaammo na pay nga adda ti dua a naputar a memorandum a ti maysa ket para iti “Real property Valuation and Assessment Reform Act” ken ti pannakadalos iti tiendaan ditoy ciudad.
Malaksid iti daytoy, inpanakkel ni Alcid ti panagbalin a benepisyaryo ti Laoag City General Hospital ken ti Laoag City Public Market and Commercial Complex ti Pacific Paint Boysen Philippine Incorporated no sadinno nga adda ti naidonar iti gobierno lokal ditoy ciudad a P5-milyon a pisos a balor ti pinta a nausar para kadagiti nasao nga establisimiento.
Kuna na pay nga iti Laoag City General Hospital ket ngimmato ti performance rating na iti 9.1% idi sipud idi Hulyo ita a tawen ken ngimmato ti napastrek na manipod iti pondo a naala na iti Philippine Health Insurance Corporation idinto a ti Professional Fees ket ngimmato met iti 91.5%.
Innayon na a ngimmato pay ti hospital charges iti Laoag City General Hospital iti 88.31% wenno kaibatugan ti 22 a milyon a pisos.
Kabayatanna, iti biang met iti tiendaan ditoy ciudad ti Laoag ket adda dagiti naisayangkat a clearing operations partikular ti pannakaikkat dagiti sidewalk vendors ket ad-adda pay a limmawa iti aglawlaw aglalo ti pagdalyasatan dagiti motorista.
Adda met dagiti nakaiwaras a traffic enforcers iti merkado publiko tapno mangiwanwan ti taray ti trapiko.
Inpanamnama met ti mayor nga intultuloy na ti pannakaipatakder ti slaughter house ditoy ciudad nga ita ket dandanin malpas ken manamnama ti pannakaiturnover na iti lokal a gobierno kabiitan a panawen.
Iti met sports program ket inkari ni Mayor Alcid nga agtultuloy ti suporta ti administrasyon na kadagiti atleta ditoy ciudad.
Kagiddan iti daytoy, inpanakkel na dagiti estudyante ditoy ciudad ti Laoag a nakilaba iti Science and Mathematics- International Competition.
Mainaig iti daytoy, inrakurak ni Alcid nga umabot iti 1,661 a senior citizens ti nabenepisyaran iti milestone award a maysa kadagiti kangrunaan a programa ti lokal a gobierno ditoy ciudad.
Nadakamat pay ti mayor dagiti naipaay a tulong ken benepisyo kadagiti mannalon, mangngalapken dadduma pay a sektor ditoy ciudad.
Inkari ni Mayor Alcid nga aramiden na amin a kabaelan tapno agtultuloy ken ad-adda pay a dumur-as ditoy ciudad ti Laoag.
