LAOAG CITY – Kalikagum ni Mayor James Bryan Alcid a mapagbalin a benchmark ditoy siudad ti Laoag iti intero a probinsia ti Ilocos Norte.
Daytoy ket babaen ti naiget a panagtitinnulong dagiti amin nga empleado ken opisial ti lokal a gobierno pakairamanan dagiti umili.
Iti panagbitla ni Mayor Alcid kagiddan ti umuna a panagatendarna iti flag raising ceremony kas Local Chief Executive ditoy siudad, inrakurakna ti kangrunaan a gagemna iti babaen ti administrasionna ket ti “double time” wenno ti alisto a panagtrabaho tapno al-alisto ken ad-adu dagiti maserbian nga umili.
Kiniddawna ti naan-anay a pannakikooper ti amin tapno balligi a magun-od iti panagdur-as ti siudad.
Mainaig iti daytoy, inpakaammo ni Ms. Mary Jane Leaño, mangidadaulo ti Communications and Media Office ditoy siudad ti Laoag nga adda dagiti sumagmamano nga empleado manipud iti Business Process and Licensing Office ken City Social Welfare and Development Office ti naipaayan ti pammigbig gapu iti napintas a performance ti trabaho dagitoy.
Babaen iti daytoy, kunana a dakkel a karit kadagiti dadduma pay nga empleado nga ad-adda a sayaatenda ti panagtrabahoda tapno dagitoy ti sumaruno a maipaayan ti pammigbig.
