LAOAG CITY – Kalikagum ni Mayor James Bryan Alcid nga ad-adda pay a maitandudo ti kalesa ditoy siudad ti Laoag.
Inpaganetgetna a saan a mabalin a mapukaw ditoy siudad ti Laoag ti kalesa gapu ta daytoy ti maysa kadagiti pakabigbigan wenno kultura ditoy siudad.
Inbatadna a plastarenda ti kalesa ditoy siudad tapno mapreserba daytoy ken inpanamnamana ti naan-anay a tulong a maipaay kadagiti kutsero.
Inlawlawagna nga addan ti panag-canvass-da iti pannakatarimaan dagiti kalesa no sadinno nakakita dagitoyen ti fabricator a mangpapintas wenno mangpatibker iti kalesa.
Kunana a ti maysa kadagiti problema dagiti kutsero ket awanen ti karpinteroda a nalaing nga agaramid ti kayo a ligay isut gapuna a nangkita dagitoy tapno ad-adda pay a matulunganda isuda.
Innayonna a babaen iti daytoy ket maitandudo ti turismo ditoy siudad ken makatulong a mapagtalinaed ti maysa kadagiti pamastrek dagiti operator wenno kutsero ti kalesa ditoy siudad ti Laoag.
