LAOAG CITY – Posible a mapilaan manen ti kaso administratibo ni Mayor Alfredo Valdez iti ili ti San Nicolas no bilang mapaneknekan nga adda ti nagliwayanna kas Local Chief Executive iti panagsalungasing ti Venvi Agro-Industrial Corporation ti Philippine Clean Water Act of 2004.
Daytoy ti kinumpirmaran ni Sangguniang Panlalawigan Member ken Chairman ti Committee on Laws Atty. Da Vinci Crisostomo.
Segun ken ni Crisostomo, mannarimaan pay laeng ti imbestigasion ken panangadal ti Department of Environment and Natural Resources (DENR) iti posible a pannakasuspenso ti Environmental Compliance Certificate wenno ECC iti nasao a pasdek negosio.
Kuna na nga agpapan ita a gundaway ket awan pay ti naawat ti Sangguniang Panlalawigan a sungbat wenno aksyon nga aramiden ti DENR mainaig iti daytoy a banag pakairamanan ti pannakaipila ti reklamo kriminal kontra iti Venvi Agro-Industrial Corp.
Mainaig iti daytoy, inbunannag ni Crisostmo nga adda ti maysa a kameng ti Sangguniang Bayan iti ili ti San Nicolas ti nakasarsaritana nu sadino nga inadmitirna kenkuana a marigatanda iti pannakaipatungpal dagiti pagalagadan pakaseknan iti ordinansada a maaw-awagan ti Kalikasanicolas ken ti panangarisit iti pasdek negosio gapu ta agkapamilia dagiti maseknan.
Maipalagip a tawenen ti napalabas sipod nangrugi a tumpuar ti problema dagiti sumagmamano a residente iti nasao nga ili gapu ta apektado ti panagbiagda ken pagsapulanda kadagiti rugit a maipapaayos iti Nagabungan Creek.
Immuna iti daytoy, napilaan ti kaso administratibo ni Mayor Valdez mainaig iti operasion ti Cockpit Arena iti ili ti San Nicolas a nangitunda ti pannakasuspensona itay kallabes.
Kabayatanna, inpasingked ni Mayor Alfredo Valdez iti ili ti San Nicolas a nu adda man ti mangsungbat kadagiti nalabsing a pagganurutan ti Environment Management Bureau (EMD) ket ti mismo a Venvi Agro-Industrial Corp.
Nu pay kasta, inbatad na a sidadaan a mangsurot iti agbalin a desisyon ti Sangguniang Panlalawigan kenkuana.
Kabayatanna, inlawlawag ni Mr. Daryl Saguid, representative ti probinsya iti EMB nga addan ti naiyuswat a technical conference nu sadino a nabalakan ti Venvi kadagiti nasken nga aramiden da tapno maisimpa ti posible a pannakasalungasing ti Philippine Clean Water Act of 2004.
Mainaig iti daytoy, kuna na a manarimaan ti pannakaevaluate ti nasao a kompanya babaen iti regional office.
Mainaig iti daytoy, inbatad ni Saguid a nu bilang adda ti maduktalan a panaglabsing ti kompanya iti Philippine Clean Water Act of 2004 ket daytoy ti mapilaan ti kaso ken saan a ti mayor iti ili ti San Nicolas.
