LAOAG CITY – Inbatad ni impeachment court spokesperson Atty. Reginald Tongol nga awan ti special arrangement a naipaay ken ni Davao City Mayor Sebastian “Baste” Duterte iti panagsangona kas testigo iti impeachment trial ti kabsatna a ni Vice President Sara Dutere.
Segun ken ni Tongol, mabalin nga usaren ni Baste ti holding room a naikeddeng para iti vice president no kiddawenna daytoy iti impeachment court, bayat a mabalin pay daytoy nga agtalinaed iti lugar a pagururayan dagiti testigo ti batangda iti uneg ti Senado.
Innayon pay ni Tongol a paset laeng daytoy iti proseso ti impeachment proceedings ken saan daytoy a maysa nga espesyal a prebelehio para iti Mayor.
Maipalagip a pinaayaban ti impeachment court ni Mayor Duterte a sumango kas prosecution witness inton Setiembre 28 wenno 29, no sadinno manamnama a masaludsod kenkuana dagiti nagbalin a transaksion iti nagbaetan ti Davao City government ken ti GenCorp Industries, maysa a kumpanya nga indeklarar ni VP Sara kas business interest-na iti Statements of Assets, Liabilities and Net Worth-na.
Malaksid kadaytoy, nabilin pay ti Mayor a mangitugot kadagiti opisial a record ken kontrata manipud iti tawen 2020 agingga ita a tawen nga adda pakainaiganna kadagiti transaksion ti City Hall iti GenCorp ken kadagiti aniaman nga entity a kukua wenno idadauloan ti sangay ti kumpanya ti fast food.
Maipalagip a nagbalin a paset ti impeachment complaints kontra ken ni Vice President ti GenCorp kalpasan ti panangideklarar ni Sara ti interesna iti kumpanya iti SALN-na.
