LAOAG CITY – Nangipila ti baro a reklamo kriminal ken administratibo ti kampo ti pamilia Duterte kontra kadagiti nangangato nga opisial ti Marcos administration ken police officers iti Office of the Ombudsman ita nga aldaw ti Lunes, Septiembre 15.
Daytoy ket adda ti pakainaiganna iti pannakaarestar ti amana a ni dati a Presidente Rodrigo Duterte iti Ninoy Aquino International Airport (NAIA) idi Marso 11 iti agdama a tawen.
Iti 160 a panid nga affidavit complaint, inakusaran ni Davao City Acting Mayor Baste da Justice Secretary Jesus Crispin Remulla, DILG Sec. Jonvic Remulla, DND Sec. Gilbert Teodoro, NSA Eduardo Ano ken dadduma pay nga opisial ti kidnapping, arbitratry detention, grave misconduct ken dadduma pay a panaglabsing iti linteg.
Nainaganan pay kas respondent iti reklamo da dati a Philippine National Police (PNP) Chief Gen. Rommel Francisco Marbil, dati a Criminal Investigation and Detection Group Director Maj. Gen. Nicolas Torre III, Prosecutor General Richard Anthony Fadullon, DOJ Undersecretary Nicholas Felix Ty ken dadduma pay a pulis ken justice officials.
Nakailanad iti reklamo nga apaman a nakasangpet ti dati a Presidente ditoy pagilian manipud idiay Hong Kong kaduana ti miembro ti pamiliana ken ni dati nga Executive Secretary Salvador Medialdea ket puersa nga inkabilda iti Villamor Air Base, naiget a binantayan ti sumagmamano nga oras ken saan a nagbayag ket nagturongda iti The Hague idiay Netherlands nga awan ti due process.
Kunana a narigatan pay ti access iti medical treatment ti amana iti baet ti rikriknaenna a seryoso a diabetic condition.
Namunganay daytoy a tignay ni Acting Mayor Baste nga ituloy ti kaso gapu ta nagtalined pay laeng ti amana a nakabalud iti ballasiw taaw ken saanna a kabaelan a mangipila ti dati a Presidente dagiti kaso.
