LAOAG CITY – Kinumpirmaran ni Mayor Rafael Benemerito iti ili ti Pagudpud nga adda ti maysa a pagtaengan iti Brgy. Pancian iti nasao nga ili a dandani a nagaburan gapu ti panagreggaay ti daga gubuay ti napigsa a tudo.
Kuna na nga awan ti nadangran kadagiti agnanaed iti nasao a pagtaengan ken dagitoy ket dagus a naibakwit da iti nataltalged a lugar.
Inbatad ni Benemerito nga adda pay dagiti sumagmamano a residente iti Brgy. Balaoi a naibakwit gapu ta nalayos dagiti pagtaenganda.
Inpasigurado na ti maipaay a tulong para kadagiti naapektaran ti napigsa a tudo babaen iti Municipal Social Welfare and Development Office.
Inbatadna a mannarimaan pay laeng ti koordinasion ti MSWDO kadagiti barangay a naapektaran iti napigsa a tudo a nangitunda ti nakaro a layos.
Inlawlawag na a makadalyasat met pay laeng dagiti tattao ken lugan kadagiti kalsada ti ili da.
Innayon ni Benemerito nga agtultuloy ti pannakamonitor iti aglawlaw ti ili kangrunaanna kadagiti nakapasar ti layos babaen iti Municipal Disaster Risk Reduction and Management Office.
